Isa
Chi te ricorda più, vecia coriera,Ultima diligenza de cità.
Baldraca a quattro rode, insbeletà
De verde e zalo, baracon da fiera
E machina de tuti, gran zavata.
Careta sderenà, mussa a motore
Impelicià de tempo e de vapore,
museo ambulante, scatolòn de lata…!
E chi saràlo stà ch’el rovigoto
De altri tempi che gà ‘vu el bon gusto
De intaconarte el nome adato, giusto,
Confidenziale, alegro e tracagnoto
Caro nome de serva contadina
Calà in cità a servire l’Avocato,
El Farmacista, el Podestà, el Curato
De la vecia Rovigo in cartolina…
Serva de tuti, te sì stà, coriera,
Serva de tuta quanta ‘ne fameja:
Rovigo de altri tempi, manco sveja,
Ma più onesta, più semplice, più vera,
Tuta listòn da sgàlmare, sentieri,
Pòrteghi, orti, corte de pegnate,
Quinte de piera che pareva fate
Aposta pa’l teatro de Palmieri.
E senza distinzion te ghe servio
Siori sfondà, onorevoli, po’aréti,
guardie, sassini, nobildonne, preti,
(zente importante o col tacon de drio)
Scienze, bagiani, farabutti, santi…
E in do regimi, senza far politica,
Vecia coriera amabile e ridicola,
A te gà menà in giro tuti quanti.
El tò dovere gèra de servire
Senza badare a questo o a chel capello
Ghe fosse tempo bruto o tempo belo,
El To mestiere gera de partire
Portare i rovigoti a la Stazion
Coi to eteni viageti giornalieri,
O andarli a tore come forestieri
Par descargarli in piazza, sul listòn
ma un bruto giorno de tant’ani fa,
Visto che el cuore te bateva male,
Se ga riunio la giunta comunale
Par darte el benservìo che tuti sa.
I t’à mandà, partendo da la Borsa,
nel çimitero de le robe vece,
da Romanin, fra tubi roti e sece
(l’ultimo viagio, l’ultima to’ corsa),
Par farghe largo in nome del Progresso,
a le coriere alegre sempre più,
Che co’ la moda che gh’è in giro adesso,
le se ribela e no’ le serve più.
A. Savaris
Nessun commento:
Posta un commento